ياربي تسهل الأمر وتزين الأحوال

بسمـ الله الرحمن الرحيمـ

قصيدهـ فيها من الواقع الشي الكثير

ياربي تسهل الامر وتزين الاحوال
ترانا بلا رحمتك هلكا ومتهاوين

ولا عندنا غيرك ليا صك جال(ن) جال
ضعوف الاوادم ياقوي فيك متقوين

ابي رحمتك حي وفي القبر والاهوال
نهار الحساب مشيب الرضع الولدين

لنا حقوق وعلينا حقوق وماحط يشال
زمان يخلي ضاحكينه من الباكين

ماينزل به الراحل ويرحل به النزال
ومواعيدنا واجالنا كل شي بحين

فياحظ من طابت فعايله والاعمال
وياشين حظ اللي لاوحده ولا ثنتين

هبوب الزمان وكنته والبراد اشكال
تقلب به الدنيا واهلها على الجنبين

ولا اصعب على الصاحيين من كثرة الجهال
ولا اقسى على الجهال من سطوة الصاحيين

عسى الله يصيب مدور الشر بالسلال
وعسانا لاظلام ولاحن بمظلومين

ولانطرد المقفي ولانكره الاقبال
ولانخطي اليا صار مانقبل المخطين

لو انهم تناسوا فعلنا مانقص مثقال
من اللي تناسوا جعلهم دايم(ن) ناسيين

ولا تذكرونا غير في حزة الانكال
ليا اشتدت الازمة وخالط صفا الماء طين

نطب الخطر والخوف والموت طب هبال
تقول اننا بمقابل الموت مسترين

بنفنى وتفنى عيالنا بس لانزال
عزاز النفوس اللي على حقنا عيين

على الراس كوفيه ومن فوقها دسمال
ومن دسمالي عقال(ن) يميل يمين

ولو ماتحوش ايماننا مال مانهتال
لو الوقت عاري وجه عشناه مستورين

ابو خمسة لاقل من قيمة ابو ريال
فبو نصف يقدر يقتل احلام ابو قرشين

مايوجعك يالسائل سوا جفوة السؤال
ليا صرت تقضي دين ظهرك بمثله دين

ولا فيه بيت(ن) سالم(ن) من بعض الاشكال
وهدامته قله وبنايته كثيرين

لنا ماضي وحاظر مانبكي على الاطلال
مايبكي على الاطلال ياكود محرومين

لهم ماضي(ن) حلوى لكن حاظر(ن) بطال
وذولا عرب موتى ولو عادهم حيين

تقل العوايد يوم تتعاقب الاجيال
وسلوم الرجال الاوله تتعب التاليين

ولو نبكي اللي راح ياويل حال وال
بعد روحوا شيباننا الزحل الوافيين

موصيننا بالصدق في القول والافعال
وفي جمعة تهتاب من قوها الطامعين

غدينا شتات وحن عيال(ن) على رجال
رخصنا والاجناب اصبحوا عندنا غاليين

نحب الجمل والحمل ونعذرب الجمال
وهو اللي يقود الزمل من وين اليا لين

من اول يوم القل والمال ماينطال
قبل شركة الكهرب تنور بيوت الطين

يوم ان الرفيق اغلى من الروح والمنزال
ويوم ان الرفيق ان غاب نفقده فقد(ن) شين

وذلحين الاخ يقاطع اخوه حيل وحال
ولا حسته الايام ولا غراب البين

اخوي ابن ابوي ان كان مايردع العيال
اليا عال فيني رحت به في ( سند الاثنين )

ابيعه كذا واشرب ورا بيعته فنجال
وانا دون عمري قبل يولد الى ذلحين

جروح العرب تبرى وجرح الاخو قتال
وجرح العرب واحد وجرح الاخو جرحين


ولو يبتلى والله ماخليه لين يهال
علي القبر ولا انتصر له من الغاويين

يقولون جيبك اكبر اخوانك العقال
وانا اقول وقفة الاخ تسوى كنوز الصين

عطاني الزمن كل شي الا مرهـ واطفال
عسى الله يكمل زينتي في الحياة امين

لاتحزن ولا تزعل تماسك وهد البال
ترى العاقل اللي يحسب حساب وقته زين

رفيقك تحمل له ثلاث لاشك ثقال
لكن رابعته افطن لها واخذ حق ودين

والاولاد وهبه لاعمام(ن) ولا بخوال
عسى الله يصلح ماعطانا من الجنسين

ياكم بنت هامل جا ولدها بطل الابطال
وكم بنت شيخ(ن) جا ولدها قصير ايدين

زكاة العوال معاكستها زكاة المال
لاطاب الك واحد فادفن عوالك الباقيين

الشاعر/على بن حمري

صح لسان الشاعر
وتسلم يمينك على النقل الجميل



انتظر جديدك

صح السان الشاعر

ويعطيك العافي يالغالي

لا خلا ولا عدم جديدك

روعه والله
كلام حكم

صح لسان شاعرها
وتسلم يدك الهاجري على النقل الرائع
تقبل مروري